Ayuntamiento de Tafalla/Tafallako Udala

Tafallako Udalak Tafalla App aplikazio berria jarri du martxan kirol instalazioen erreserbak errazteko. Aplikazioa apirilaren 7an aurkeztu zuten Kirol zinegotzi Iñaki Sotak eta arloko teknikari Yago Navarrok, eta apirilaren 13tik aurrera guztiz martxan dago.

Android eta iOS gailuetarako eskuragarri dagoen aplikazioak aukera ematen du espazioen erabilgarritasuna denbora errealean kontsultatzeko, edozein lekutatik erreserbak egiteko eta hainbat saiorako bonuak erosteko. Horrez gain, ordainketa telematikoa egiteko aukera eskaintzen du; horrela, eskudirua erabiltzeko beharra saihestu eta prozesua arindu egiten da erabiltzaileentzat.

Proiektu honen barruan, Comarcales instalazioetan QR kode irakurgailuak dituzten ate automatikoak jarri dituzte. Sistema horri esker, erabiltzaileek instalaziora sartu ahal izango dute, eta frontoiko argiak automatikoki piztuko dira sartzean. Udalaren arabera, proba pilotu bat da, eta emaitza onak emanez gero, etorkizunean beste kirol gune batzuetara ere zabaldu ahal izango litzateke, bereziki jai garaietan edo udal langilerik ez dagoen ordutegietan.

Ekimenaren ideia antzeko esperientziak aztertu ondoren sortu zen; besteak beste, Artajonan, Valle de Arangurenen, Mendavian eta Pitillasen antzeko sistemak martxan baitituzte. Kirol arloko arduradunek adierazi dute lehen probak arrakastatsuak izan direla eta herritarrek sistema azkar barneratu dutela.

Aplikazioa erabiltzeko, aurrez izena eman beharko da. Horretarako, Udalak QR kodeak jarri ditu kirol instalazioetan, bai aplikazioa deskargatzeko, bai erabilera gida kontsultatzeko. Ereta instalazioetan erreserbatu ahal izango diren jardueren artean daude tenisa, squash-a, rokodromoa, boulderra eta frontoia.

DESKARGATU HEMEN