Ayuntamiento de Tafalla/Tafallako Udala

Datorren ostiralean, martxoak 8, Emakumearen Nazioarteko Egunaren atarian, Erdialdeko herriek ekitaldiz betetako programak prestatu dituzte. Tafallak ostiral honetan aurkeztu zuen berea, Udaletxeko prentsa aretoan egindako ekitaldi xume batean. “Tafalla emakumeen eta gizonen arteko berdintasunarekin konprometitutako hiria da, eta konpromiso hori ikuspegi eta erakunde ezberdinetatik jorratzen da modu bateratu eta koordinatuan”, azaldu du Goizeder Juango Berdintasun zinegotziak. “Adierazpen instituzionalari atxikitako 48 erakundeok partekatzen dugun aurtengo kanpainaren leloa “Matxismoa ixildu” da. Horren bidez, berdintasunerako politika publikoen eta feminismoaren balioa agerian utzi nahi izan da, eta, aldi berean, fokua planteamendu feministen aurkako eta berdintasunaren aldeko erasoak modu antolatuan sustatzen ari diren Interneteko espazioetan kokatzen du”, adierazi du.

Egitarauari dagokionez, asteburu honetan hasi zen Kultugunean Puntido Teatro taldearen Memoria eraikitzen antzezlanarekin. Hurrengo ekitaldia martxoaren 6an, asteazkena, izango da eta Tafallako Musika Bandaren kontzertua hilaren 9an, larunbata. Igandea, hilak 10, Berdesiaren lankidetzarekin landaketa feminista baterako erreserbatuta dago, eta asteartean, hilak 12, Amores imposibles antzezlanarekin antzerkira joateko aukera egongo da. Plater nagusia martxoaren 8an, ostirala, izango da. Goizean, 12:00etan, Nafarroako Plazan, adierazpen instituzionala irakurriko da.

Arratsaldean, 19:00etatik aurrera, Tafallako emakumeak aitortzeko ekitaldia egingo da. Aurten 50 urte bete dituen Tafallako Musika Eskolako sustatzaileetako bat den Julia Jaurrieta, laurogeita hamarreko Peña Sport FCko lehen lehendakaria eta bakarra den Uxua Zabalza Osés eta María José Calasanz biologoa izango dira. Errekonozimenduen ondoren, Tafallako talde feministek deitutako elkarretaratze eta manifestazioaren txanda izango da, Plazatik abiatuta. Amaitzeko, Chica Sobresalto taldearen kontzertua izango da Kulturgunean.

IKUSI EGITARAUA OSORIK