Ayuntamiento de Tafalla/Tafallako Udala

Tafallan taberna eta jatetxe ugari daude: pintxoak, tapak, ogitartekoak, plater konbinatuak eta lehengaiekin eta kalitate goreneko tokiko produktuekin egindako menuak.

Tafallako gastronomiaren adierazgarririk onena bere lehengaia da. Zidakosek ureztatutako baratzetako produktu freskoek beren zapore -eta kolore-eskaintza berezia ematen diote denboraldi bakoitzean sukaldaritza sinple bati. Sukaldaritza hori etxeko sukaldeetan, elkarte gastronomiko ugarietan, pintxo-tabernetan eta hiriko jatetxe ospetsuetan gurtzen da. Tafallako sukaldaritza aberatsa, askotarikoa eta zaporetsua da.

Plater tipikoen artean, barazki-menestra, potxak galeperrekin, ajoarrieroa barraskiloekin, arkumea txilindron erara, arkume-saiheskiak sarda-txingarretan, arkume-menudikoak edo patata eta haragi eltzekaria daude. Postre bereizgarrienak hostopilezko pastelak, esne frijitua, arroz-esnea, haizezko kauserak edo bizkotxada dira. Plater horien errezetak belaunaldiz belaunaldi transmititu dira. Bazkaria gainera Nafarroa Jatorrizko Deitura duten eskualdeko ardo onekin batera konbinatu ohi da. Honetaz gain, deigarria da txerritik eta, bereziki, txistorratik eratorritako hestebete ugari daudela hiriko ostalaritzako lokalen eskaintza gastronomikoan.

Gastronomia tradizionalari plater berriagoak gehitu zaizkio, oinarrizko osagaietatik abiatuta. Patatekin egindako baratxuri eta zerba egosietatik, krepe gozoen edo arrautzaztatuen errezetak sortu dira, saltsa zaporetsuekin. Zainzuriek edo kardoek pintxoak inspiratu dituzte, eta horiek opari dira begi-bistarako eta aho-sabairako. Tafallako sukaldaritza eboluzionatu egin da, osagai klasikoen benetako altxorra galdu gabe, eta horrek nazioarteko proiekzioa eman dio, zalantzarik gabe.